Chapitre LI

Povrquoy est dicte Pantagruelion, & des admirables vertus d’icelle.

Par ces manieres (exceptez la fabuleuſe. car de fable ia Dieu ne plaiſe que vſions en ceſte tant veritable hiſtoire) eſt dicte l’herbe Pantagruelion. Car Pãtagruel feut d’icelle inuenteur. ie ne diz quant a la plante, mais quant a vn certain vſaige, lequel plus eſt abhorré & hay des larrons: plus leurs eſt contraire & ennemy, que ne eſt la Teigne & Cuſcute au Lin, que le Rouſeau à la Fougere: que le Preſle aux Fauſcheurs: que Orobanche aux poys Chices: Ægilops a l’Orge: Securidaca aux Lentilles: Antranium aux Febues: l’Yuraye au Froment: le Lierre aux Murailles: que le Nenuphar & Nymphæa Heraclia aux ribaux Moines, que n’eſt la Ferule & le Boulas aux eſcholiers de Navarre, que n’eſt le Chou, a la Vigne: le Ail, a l’Aymant: l’Oignon, a la veue: la graine de Fougere, aux femmes enceintes: la ſemence de Saule, aux Nonnains vitieuſes: l’umbre de If, aux dormans deſſoubs: le Aconite, aux Pards & Loups: le flair du Figuier, aux Taureaux indignez: la Cigue aux Oiſons: le Poupié, aux Dents: l’Huille, aux Arbres. Car maintz d’iceulx auons veu par tel vſaige finer leur vie hault & court: a l’exemple de Phyllis royne des Thraces: de Bonoſus, Empereur de Rome: de Amate, femme du roy Latin: de Iphis, Auctolia, Licambe, Arachne, Pheda, Leda, Acheus roy de Lydie, & aultres: de ce ſeulement indignez, que ſans eſtre aultrement mallades, par le Pantagruelion on leurs oppiloit les conduictz, par les quelz ſortent les bons motz, & entrent les bons morceaulx, plus villainement que ne feroit la male Angine & mortelle Squinanche.

Aultres auons ouy ſus l’inſtant que Atropos leurs couppoit le fillet de vie, soy griefuement complaignans & lamentans de ce que Pantagruel les tenoit à la guorge. Mais (las) ce n’estoit mie Pantagruel. Il ne feut oncques rouart, c’eſtoit Pantagruelion, faiſant office de hart, & leurs ſeruant de cornette. Et parloient improprement & en Soloeciſme. Si non qu’on les excuſaſt par figure Synecdochique, prenens l’inuention pour l’inuenteur. Cõme on prent Ceres pour pain, Bacchus pour vin. Ie vous iure icy par les bons motz qui ſont dedãs ceſte bouteille la qui refraischit dedãs ce bac, que le noble Pantagruel ne print oncques a la guorge ſi non ceulx qui ſont negligens de obuier a la ſoif imminente.

Aultrement eſt dicte Pãtagruelion par ſimilitude. Car Pantagruel naiſſant on monde eſtoit autant grand que l’herbe dont ie vous parle. & en feut prinſe la mesure aiſement: veu qu’il naſquit on temps de alteration, lors qu’on cuille ladicte herbe, & que le chien de Icarus par les aboys qu’il faict au Soleil, rend tout le monde Troglodyte, & conſtrainct habiter es caves & lieux ſubterrains.

Aultrement eſt dicte Pantagruelion par ſes vertus & ſingularitez. Car comme Pantagruel a eſté l’Idée & exemplaire de toute ioyeuse perfection, (ie croy que perſone de vous aultres Beuueurs n’en doubte) auſsi en Pantagruelion ie recõgnoys tant de vertus, tant d’energie, tant de perfection, tant d’effectz admirables, que ſi elle euſt eſté en ſes qualitez cõgneue lors que les arbres (par la relation du Prophete) feirent election d’un Roy de boys pour les regir & dominer, elle ſans doubte euſt emporté la pluralité des voix & ſuffrages. Diray ie plus? Si Oxylus filz de Orius l’euſt de ſa ſoeur Hamadryas engendrée, plus en la ſeule valeur d’icelle ſe feuſt delecté, qu’en tous ses huyct enfans tant celebrez par nos Mythologes, qui ont leurs noms mis en memoire eternelle. La fille aiſnée eut nom Vigne. le filz puyſné eut nom Figuier: l’aultre Noyer, l’aultre Cheſne, l’aultre Cormier, l’aultre Fenabregue, l’aultre Peuplier, le dernier eut nom Vlmeau, & feut grand Chirurgien en ſon temps.

Ie laiſſe a vous dire comment le ius d’icelle exprimé & inſtillé dedans les aureilles tue toute eſpece de vermine, qui y ſeroit née par putrefaction, & tout aultres animal qui dedans ſeroit entré. Si d’icelluy ius vous mettez dedans vn ſeilleau de eaue, ſoubdain vous voirez l’eaue prinſe, comme ſi feuſſent caillebotes, tant eſt grande ſa vertus. Et eſt l’eaue ainsi caillée remede preſent aux cheuaulx coliqueux, & qui tirent des flans. La racine d’icelle cuicte en eaue, remolliſt les nerfz retirez, les ioinctures contractes, les podagres ſclirrhotiques, & les gouttes nouées. Si promptement voulez guerir vne bruſlure, ſoit d’eaue, ſoit de feu, applicquez y du Pantagruelion crud, c’eſt a dire tel qui naiſt de terre, ſans aultre appareil ne compoſition. Et ayez eſguard de le changer ainsi que le voirez deſeichant ſus le mal. Sans elle ſeroient les cuiſines infames, les tables deteſtables, quoy que couuertes feuſſent de toutes viandes exquiſes: les lictz ſans delices, quoy que y feuſt en abondance Or, Argent, Electre, Iuoyre, & Porphyre. Sans elle ne porteroient les Meuſniers bled au moulin, n’en rapporteroiẽt farine. Sans elle cõment ſeroiẽt portez les playdoiers des Aduocatz a l’auditoire? Cõment ſeroit sans elle porté le plaſtre a l’haſtellier? Sans elle comment ſeroit tirée l’eaue du puyz? Sans elle que ſeroiẽt les Tabellions, les Copiſtes, les Secretaires, & Eſcriuains? Ne periroient les Pantarques & papiers rantiers? Ne periroit le noble art d’Imprimerie? De quoy feroit on chaſsis? Cõment ſonneroit on les cloches? D’elle ſont les Iſiacques ornez, les Paſtophores reueſtuz, toute humaine nature couuerte en premiere poſition. Toutes les arbres lanificques des Seres, les Goſſampines de Tyle en la mer Perſicque, les Cynes des Arabes, les vignes de Malthe, ne veſtiſſent tant de perſones, que faict ceſte herbe ſeulette. Couure les armées contre le froid & la pluye, plus certes cõmodement que iadis ne faiſoient les peaulx. Couure les Theatres & Amphiteatres contre la chaleur, ceinct les boys & taillis au plaſsir des chaſſeurs, deſcend en eaue tant doulce que marine au profict des peſcheurs. Par elle ſont bottes, botines, botaſſes, houzeaulx, brodequins, ſouliers, eſcarpins, pantofles, ſauattes miſes en forme & vsaige. Par elle ſont les arcs tendus, les arbeleſtes bandées, les fondes faictes. Et comme ſi feuſt herbe ſacre, Verbenicque, & reuerée des Manes & Lemures les corps humains mors ſans elle ne ſont inhumez.

Ie diray plus. Icelle herbe moyenante les ſubſtances inuiſibles visiblement ſont arreſtées, prinſes detenues, & comme en priſon miſes. A leur prinſe & arreſt ſont les groſſes & peſantes moles tournées agillement a inſigne profict de la vie humaine. Et m’esbahys comment l’inuention de tel vsaige a eſté par tant de ſiecles celé aux antiques Philoſophes, veue l’utilité impréciable qui en prouient: veu le labeur intolerable, ſue sans elle ilz ſupportoient en leurs piſtrines. Icelle moyenant, par la retention des flotz aërez ſont les groſſes Orchades, les amples Thalameges, les fors Guallions, les Naufz Chiliandres & Myriandres de leurs ſtations enleuées, & pouſſées a l’arbitre de leurs gouuerneurs. Icelle moyenant, ſont les nations, que Nature ſembloit tenir abſconſes, impermeables, & incongneues: a nous venues, nous a elles. Choſe que ne feroient les oyſeaulx, quelque legiereté de pennaige qu’ilz ayent, & quelque liberté de nager en l’aër, que leurs ſoit baillée par Nature. Taprobrana a veu Lappia: Iaua a veu les mons Riphées: Phebol voyra Theleme: Les Iſlãdoys & Engronelands boyront Euphrates. Par elle Boreas a veu le manoir de Auſter: Eurus a viſité Zephire. De mode que les Intelligences celeſtes, les Dieux tant marins que terreſtres en ont eſté tous effrayez, voyans par l’uſaige de ceſtuy benedict Pantagruelion, les peuples Arcticques en plein aſpect des Antarcticques, franchir la mer Athlanticque, paſſer les deux Tropicques, volter ſoubs la Zone torride, meſurer tout le Zodiacque, s’esbatre ſoubs l’Æquinoctial, auoir l’un & l’aultre Pole en veue a fleur de leur Orizon. Les Dieux Olympicques ont en pareil effroy dict. Pantagruel nous a mis en penſement nouueau & tedieux, plus que oncques ne feirẽt les Aloides, par l’uſaige & vertus de ſon herbe. Il ſera de brief marié, de ſa femme aura enfans. A ceſte deſtinée ne pouõs nous cõtreuenir: car elles eſt paſſée par les mains & fuſeaulx des ſœurs fatales, filles de Neceſsité. Par ſes enfans (peut eſtre) ſera inuentée herbe de ſemblable energie: moyenant laquelle pourront les humains viſiter les ſources des greſles, les bondes des pluyes, & l’officine des fouldres. pourront enuahir les regions de la Lune, entrer le territoire des ſignes celestes, & la prendre logis, les vns a l’Aigle d’or, les aultres au Mouton, les aultres à la Courõne, les aultres a la Herpe, les aultres au Lion d’argent: s’aſſeoir a table auecques nous, & nos Déeſſes prendre à femmes. qui ſont les ſeulx moyens d’eſtre deifiez. En fin ont mis le remede de y obuier en deliberation, & au conſeil.