congneut

Les unes ont prins le nom de celluy qui premier les inventa, congneut, monstra, cultiva, aprivoisa, & appropria, comme Mercuriale de Mercure: Panacea de Panace, fille de aesculapius: Armoise, de Artemis, qui est Diane: Eupatoire, du roy Eupator: Telephium, de Telephus: Euphorbium, de Euphorbus Medicin du roy Iuba: Clymenos, de Clymenus.

Et par leur récit congneut Caesar l’admirable nature de ce boys, lequel de soy ne faict feu, flambe, ne charbon: & seroit digne en ceste qualité d’estre on degré mis de vray Pantagruelion, & d’autant plus que Pantagruel d’icelluy voulut estre facitz tous les huys, portes, fenestres, goustières, larmiers, & l’ambrun de Thelème: pareillement d’icelluy feist couvrir les pouppes, prores, fougons, tillacs, coursies, & rambardes de ses carracons, navires, gualères, gualions, brigantins, fustes, & aultres vaisseaulx de son arsenac de Thalasse: ne feust que Larix en grande fournaise de feu provenent d’aultres espèces de boys, est en fin corrumpu & dissipé, comme sont les pierres en fourneau de chaulx.