Comment doibt estre preparé & mis en oeuvre le celèbre Pantagruelion.

Chapitre L.

On pare le Pantagruelion soubs l’aequinocte automnal en diverses manières, scelon la phantasie des peuples, & diversité des pays. L’enseignement premier de Pantagruel feut, le tige d’icelle devestir de feueilles & semence: le macerer en Eaue stagnante non courante par cinq iours, si le temps est sec, & l’eaue chaulde, par neuf ou douze, si le temps est nubileux, & l’eaue froyde. Puys au Soleil le seicher: puys à l’umbre le excorticquer, & separer les fibres (es quelles, comme avons dict, consiste tout son pris & valeur) de la partie ligneuse, laquelle est inutile, fors qu’à faire flambe lumineuse, allumer le feu, & pour l’esbat des petitz enfans enfler les vessies de porc. D’elle usent aulcunesfoys les frians à cachetes, comme de Syphons, pour sugser & avecques l’haleine attirer le vin nouveau par le bondon. Quelques Pantagruelistes modernes evitans le labeur des mains qui seroit à faire tel depart, usent de certains instrumens catharactes composez à la forme que Iuno la fascheuse tenoit les doigtz de ses mains liez pour empescher l’enfantement de Alcmène mère de Hercules. & à travers icelluy contundent & brisent la partie ligneuse, & la rendent inutile, pour en saulver les fibres. En ceste seule praeparation acquiescent ceulx qui contre l’opinion de tout le monde, & en manière paradoxe à tous Philosophes, guaignent leur vie à recullons. Ceulx qui à profict plus evident la voulent avaller, font ce que l’on nous compte du passetemps des troys soeurs Parces: de l’esbatement nocturne de la noble Circé: & de la longue excuse de Penelope envers ses muguetz amoureux, pendant l’absence de son mary Ulyxes. Ainsi est elle mise en ses inestimables vertus, des quelles vous expouseray partie, (car le tout est à moy vous expouser impossible) si davant, vous interprète la denomination d’icelle.

Ie trouve que les plantes sont nommées en diverses manières. Les unes ont prins le nom de celluy qui premier les inventa, congneut, monstra, cultiva, aprivoisa, & appropria, comme Mercuriale de Mercure: Panacea de Panace, fille de aesculapius: Armoise, de Artemis, qui est Diane: Eupatoire, du roy Eupator: Telephium, de Telephus: Euphorbium, de Euphorbus Medicin du roy Iuba: Clymenos, de Clymenus. Alcibiadion, de Alcibiades: Gentiane, de Gentius roy de Sclavonie. Et tant a esté iadis estimée ceste praerogative de imposer son nom aux herbes inventées, que comme feut controverse meue entre Neptune & Pallas de qui prendroit nom la terre par eulx deux ensemblement trouvée: qui depuys feut Athènes dicte, de Athène c’est à dire Minerve: pareillement Lyncus roy de Scythie se mist en effort de occire en trahison le ieune Triptolème envoyé par Cerès pour es hommes monstrer le froment lors encores incongneu: affin que par la mort d’icelluy il imposast son nom, & feust en honneur & gloire immortelle dict inventeur de ce grain tant utile & necessaire à la vie humaine. Pour laquelle trahison feut par Cerès transformé en Oince, ou Loupcervier. Pareillement grandes & longues guerres feurent iadis meues entre certains Roys de seiour en Cappadoce, pour ce seul different, du nom des quelz seroit une herbe nommée: laquelle pour tel debat feut dicte Polemonia, comme Guerroyère.

Les aultres ont retenu le nom des regions des quelles feurent ailleurs transportées, comme pomme Medices, ce sont Poncire de Medie, en laquelle feurent premierement trouvées: pommes Punicques, ce sont Grenades, apportées de Punicie, c’est Carthage. Ligusticum, c’est Livesche, apportée de Ligurie, c’est la couste de Gènes. Rhabarbe, du fleuve Barbare nommé Rha comme atteste Ammianus: Santonicque, foenu Grec: Castanes, Persicques, Sabine, Stoechas, de mes isles Hières antiquement dictez Stoechades, Spica Celtica, & aultres.

Les aultres ont leur nom par Antiphrase & contrarieté: comme Absynthe, au contraire de pynthe, car il est fascheux à boyre. Holosteon, c’est tout de os: au contraire, car herbe n’est en nature plus fragile & plus tendre, qu’il est.

Aultres sont nommées par leurs vertus & operations, comme Aristolochia, qui ayde les femmes en mal d’enfant. Lichen qui guerist les maladies de son nom. Maulue qui mollifie. Callithrichum, qui faict les cheveulx beaulx. Alyssum, Ephemerum, Bechium, Nasturtium, qui est Cresson Alenoys: Hyoscyame, hanebanes, & aultres.

Les aultres par les admirables qualitez qu’on a veu en elles, comme Heliotrope, c’est Soulcil, qui suyt le Soleil. Car le Soleil levant, il s’espanouist: montant, il monte: declinant, il decline: soy cachant, il se cloust. Adiantum: car iamais ne retient humidité, quoy qu’il naisse près les eaues, & quoy qu’on le plongeast en eaue par bien long temps: Hieracia, Eryngion, & aultres.

Aultres par Metamorphose d’hommes & femmes de nom semblable: comme Daphné, c’est Laurier, de Daphné: Myrte, de Myrsine: Pytis, de Pytis, Cynara, c’est Artichault: Narcisse, Saphran, Smilax, & aultres.

Aultres par similitude, comme Hippuris (c’est Prelle) car elle ressemble à queue de Cheval: Alopecuros, qui semble à la queue de Renard: Psylion, qui semble à la Pusse: Delphinium, au Daulphin: Buglosse, à langue de Beuf: Iris, à l’arc en ciel, en ses fleurs: Myosata, à l’aureille de Souriz: Coronopous, au pied de Corneille. Et aultres. Par reciprocque denomination sont dictz les Fabies, des Febves: les Pisons, des Poys: les Lentules, des Lentiles: les Cicerons, des poys Chiches. Comme encores par plus haulte resemblance est dict le nombril de Venus, les cheveulx de Venus, la cuve de Venus, la barbe de Iuppiter, le sang de Mars, les doigtz de Mercure: Hermodactyles: & aultres.

Les aultres de leurs formes: comme Trefeueil, qui a trois feueilles: Pentaphyllon, qui a cinq feueilles: Serpoullet, qui herpe contre terre: Helxine, Petasites, Myrobalans, que les Arabes appellent Béen, car ilz semblent à gland, & sont unctueux.